პენი მსოფლიოს ერთ-ერთი უძველესი არასამთავრობო ორგანიზაცია, რომელიც თავდაპირველად აერთიანებდა პოეტებს, ესეისტებსა და პროზაიკოსებს. მოგვიანებით ის იქცა ორგანიზაციად, სადაც ჟურნალისტებიც გაერთიანდნენ. პენ ცენტრი ხელს უწყობს გამოხატვისა და შემოქმედებით თავისუფლებას ლიტერატურის მხარდაჭერისა და განვითარების გზით და ადამიანის უფლებების ადვოკატირებით მსოფლიოს 100-ზე მეტ ქვეყანაში.
PEN International ამჟამად ასზე მეტ ორგანიზაციას აერთიანებს. საქართველო PEN-ის ოჯახს 1991 წელს შეუერთდა და დღემდე არაერთი პროექტი განახორციელა შემოქმედებითი გამოხატვის თავისუფლების მხარდასაჭერად მთელი ქვეყნის მასშტაბით, ქართველი ავტორების ჩართულობითა და ადგილობრივი თუ საერთაშორისო პარტნიორების დაფინანსებით.
სირთულეები, რომელთა წინაშეც დღეს დგას ქართული კულტურის სფერო, პენ საქართველოს განსაკუთრებულ მნიშვნელობას სძენს, როგორც ახალ პლატფორმას საქართველოში გამოხატვის თავისუფლების დასაცავად.
ხათუნა ცხადაძე
პრეზიდენტი
მთარგმნელი ხათუნა ცხადაძე „საქართველოს პენცენტრის“ ახალი პრეზიდენტია. არჩევნები 2023 წლის 30 სექტემბერს ჩატარდა.
1998-2020 წლებში ხათუნა ცხადაძე ასწავლიდა ჯერ იტალიურ ენას, შემდეგ კი – თანამედროვე იტალიურ ლიტერატურას ივანე ჯავახიშვილის სახელობის თბილისის სახელმწიფო უნივერსიტეტში. 2020 წლიდან ასწავლის გივი ზალდასტანიშვილის სახელობის ამერიკულ აკადემიაში.
ხათუნა ცხადაძეს ნათარგმნი აქვს იტალო კალვინოს, უმბერტო ეკოს, პიერ პაოლო პაზოლინის, ანტონიო ტაბუკის და სხვა იტალიელ ავტორთა ნაწარმოებები.
ნატა ლომოური
აღმასრულებელი დირექტორი
ნატა ლომოური ისტორიის მეცნიერებათა დოქტორი, საერთაშორისო საზოგადოებათა სპეციალისტი და კულტურის მენეჯერია. 2011-2023 წლებში იყო მწერალთა სახლის დირექტორი.
2023 წელს ნატა ლომოური დაჯილდოვდა პრემია „საბას“ სპეციალური პრიზით „თანამედროვე ქართული ლიტერატურული პროცესების ხელშეწყობისა და განვითარებისთვის“.
ნინო ბექიშვილი
პროექტების მენეჯერი
ნინო ბექიშვილი ფილოლოგი და მთარგმნელია. აქვს ჟურნალისტად და რედაქტორად მუშაობის გამოცდილება. 2014-2023 წლებში მუშაობდა მწერალთა სახლში ლიტერატურული და სამოქალაქო პროექტების მენეჯერად.
